მთავარი მსახიობია


„პრემიერის" პრემიერა.

ლალი როსებას პიესა - ერთ-ერთი საუკეთესო (მისსავე „პროვინციულ ამბავთან" ერთად) იმათ შორის, რაც თანამედროვე საქართველოში დაწერილა.
გასული საუკუნის 80-იან წლებში მარჯანიშვილის თეატრში დადგმული.
მედეა კუჭუხიძის რეჟისორობით.
მსახიობთა ბრწყინვალე ანსამბლით.
ელენე ყიფშიძის განსაკუთრებული სიკაშკაშით.
***
გორის თეატრში დიმიტრი ხვთისიაშვილმა დადგა.
ისეთი პიესაა, ზედმეტ რეჟისორულ გამომგონებლობას არც ითხოვს და ვერც აიტანს.
აქ ყველაფერი მსახიობმა უნდა თქვას და გამოხატოს.
მედეა კუჭუხიძის რეჟისურა სადა და უბრალო იყო, გარემო - ყოფითი და ჩვეულებრივი, გარეგნული ეფექტებისგან თითქმის სრულიად დაცლილი, პირობითობაც - მინიმალური.
თუ კარგად მახსოვს და სწორად ვადარებ, ავეჯიც კი გორელთა სპექტაკლში უფრო მდიდრულია.
საერთოდ, დახვეწილი და მიმზიდველი სამოქმედო არეა.
როცა შეიტყობ, რომ მხატვარი თინათინ ჰაინე - შველიძეა, ეს არ გაგიკვირდება.
***
მთავარი მსახიობია!
ეს პრინციპი აქ თავისთავად და დაუნდობლად მოქმედებს.
მსახიობისგან მაქსიმალურ გულწრფელობას, სცენურ სიმართლეს მოითხოვს.
აქ მაყურებელს იოტისოდენა სიყალბეც არ გამოეპარება.
მით უფრო დაუშვებელია ყალბი მანერულობა და კიდევ უფრო - ვულგარულობაში გადასული სითამამე.
აქ „თამაში" აკრძალულია. უნდა იცხოვრო.
კი, გარკვეულად, აქ თეატრი თეატრშიც არის.
ამ დროს „თამაში" ნებადართულია, მაგრამ ეს „თამაში" იმ „არათამაშისაგან" მკვეთრად უნდა განსხვავდებოდეს.
მოკლედ რომ ვთქვათ, ლალი როსებას უაღრესად მართალ პიესაში თამაში მსახიობისგან განსაკუთრებულ გემოვნებას მოითხოვს.
***
რეჟისორმა მსახიობებს შეუქმნა სრულყოფილი გარემო საიმისოდ, რომ თავიანთი გრძნობები თუ ვნებები მაქსიმალური ბუნებრიობით გამოავლინონ.
კარგად უნდა გაიაზრონ მთავარი: ამ პიესის პერსონაჟები, უმეტესად, ერთი თეატრალური ოჯახის წევრები არიან. ისინი მკაცრად ეპყრობიან ერთმანეთს, მაგრამ ეს არ ნიშნავს, რომ ერთმანეთი სძულთ.
დედა რომ სკამიდან მოულოდნელად გადმოვარდება(და არა გადმოაგდებენ), ეს შვილისთვის თავზარდამცემი უნდა იყოს.
***
„პრემიერის" პრემიერა გუშინ შედგა.
რამდენადაც ვიცი, დღეს სპექტაკლის ნახვას ჩემზე უფრო საშიში ხალხი აპირებს.
ამიტომაც გამეხარდება, თუ მსახიობები ჩემი გულშემატკივრული რჩევების გათვალისწინებას დღესვე მოასწრებენ.
***
თეატრმცოდნე ნათელა ურუშაძეს აქვს ნათქვამი, - ლალი როსებას პიესებს რომ კითხულობ, ისეთი გრძნობა გაქვს, თითქოს, ღამით, განათებული ოთახის ფანჯარაში იჭვრიტები და ოჯახის წევრთა ურთიერთობას იქიდან აკვირდებიო.
სპექტაკლმაც ასეთი შთაბეჭდილება უნდა შეგვიქმნას.
***
წარმატებას ვუსურვებ გორის სახელმწიფო თეატრის ნიჭიერ დასს.
იოსებ ჭუმბურიძე
13 ოქტომბერი, 2023
387861720 7153883801311718 1110938663504042098 n