ნოდარ მაჭარაშვილი
"ქეიფი სოლოლაკში"
რეჟისორი: ნიკოლოზ ჰაინე-შველიძე
მთავარი როლის (კოტე აფხაზი) შემსრულებელი ზუკა პაპუაშვილი ნოდარ დუმბაძის სახელობის IV საერთაშორისო თეატრალურ ფესტივალზე მამაკაცის საუკეთესო როლისთვის არის დაჯილდოებული. 2023
„ქეიფი სოლოლაკში“
ნოდარ დუმბაძის სახელობის IV საერთაშორისო თეატრალური ფესტივალი საზეიმოდ დაიხურა
ოზურგეთის ალექსანდრე წუწუნავას სახელობის სახელმწიფო დრამატულ თეატრში საზეიმოდ დაიხურა ნოდარ დუმბაძის სახელობის IV საერთაშორისო თეატრალური ფესტივალი, რომელიც საქართველოს კულტურის, სპორტისა და ახალგაზრდობის სამინისტროს მხარდაჭერით ჩატარდა. ღონისძიებას კულტურის, სპორტისა და ახალგაზრდობის მინისტრი თეა წულუკიანი, ადგილობრივი მუნიციპალიტეტის წარმომადგენლები და სხვა მიწვეული სტუმრები ესწრებოდნენ.
თეატრალური ფესტივალის დახურვის ცერემონიაზე დაჯილდოვდნენ გამარჯვებულები შემდეგ ნომინაციებში:
საუკეთესო სცენოგრაფია - ვახტანგ ქორიძე (ქუთაისის იაკობ გოგებაშვილის სახელობის თოჯინების პროფესიული სახელმწიფო თეატრი; ერლომ ახვლედიანის „ვანო და ნიკო“, რეჟისორი მარიამ სიხარულიძე).
საუკეთესო მსახიობი (ქალი) - თამარ მამულაშვილი (ნოდარ დუმბაძის სახელობის მოზარდ მაყურებელთა სახელმწიფო პროფესიული თეატრი; ნოდარ მაჭარაშვილის „ავი მუსაიფი“, რეჟისორი დიმიტრი ხვთისიაშვილი);
საუკეთესო მსახიობი (მამაკაცი) - ზვიად პაპუაშვილი (გორის გიორგი ერისთავის სახელობის პროფესიული სახელმწიფო დრამატული თეატრი; ნოდარ მაჭარაშვილის „ქეიფი სოლოლაკში“, რეჟისორი ნიკოლოზ ჰაინე-შველიძე);
ქართული მწერლობის საუკეთესო სცენური ინტერპრეტაცია - აზერბაიჯანის სახელწმიფო აკადემიური ეროვნული დრამატული თეატრი (გოდერძი ჩოხელის „წერილი ნაძვებს“, რეჟისორი ნიგარ გულაჰმადოვა);
ნოდარ დუმბაძის საუკეთესო სცენური ინტერპრეტაცია - „კუკარაჩა“, რეჟისორი ბარზუ აბდურაზაკოვი (საბიტ მუკანოვის სახელობის ყაზახეთის სახელმწიფო მუსიკალური დრამატული თეატრი);
საუკეთესო რეჟისურა - ბასა ჯანიკაშვილის „ომობანა“, რეჟისორი გაუხარ ადაი (კუდუს კუჟამიაროვის სახელობის იუგურული მუსიკალური კომედიის სახელმწიფო აკადემიური თეატრი, ყაზახეთი);
გრან პრი, საუკეთესო სპექტაკლი - დავით კლდიაშვილის „სამანიშვილის დედი(ს)ნაცვალი“ (თავისუფალი თეატრი, რეჟისორი გიორგი მარგველაშვილი).
საქართველოს თეატრალურმა საზოგადოებამ სანდრო ახმეტელის სახელობის პრემია გადასცა ოზურგეთის ალექსანდრე წუწუნავას სახელობის სახელმწიფო დრამატული თეატრის სამხატვრო ხელმძღვანელს, ვასილ ჩიგოგიძეს.
თეატრალური ფესტივალის ბოლო დღეს ოზურგეთის სახელმწიფო დრამატულმა თეატრმა წარმოადგინა პორტუგალიის ქ. ბრაგის თეატრალურ კომპანიასთან ერთად შექმნილი ელენე მაცხონაშვილის საავტორო სპექტაკლი „ცის კარი“. ასევე, გაიმართა პრეზენტაცია წიგნ-ალბომებისა: „ბეჟან ნაკაიძე“, „ამირან ქადეიშვილი“, „დონ კიხოტი ოზურგეთიდან - ვასო ჩიგოგიძე“.
აღსანიშნავია, რომ თეატრალური ფესტივალის გახსნის დღეს კულტურის, სპორტისა და ახალგაზრდობის მინისტრმა თეა წულუკიანმა, ოზურგეთის მუნიციპალიტეტის მერმა ავთანდილ თალაკვაძემ, ჩოხატაურის მუნიციპალიტეტის მერმა დავით შარაშიძემ და ქ. ოზურგეთის ალექსანდრე წუწუნავას სახელობის პროფესიული სახელმწიფო დრამატული თეატრის სამხატვრო ხელმძღვანელმა ვასილ ჩიგოგიძემ ხელი მოაწერეს ნოდარ დუმბაძის სახელობის საერთაშორისო თეატრალური ფესტივალის დაფუძნების მემორანდუმს. დოკუმენტის თანახმად, ფესტივალი ორ წელიწადში ერთხელ ქალაქ ოზურგეთში ჩატარდება და თანდათან უფრო მასშტაბური გახდება.
ოზურგეთის სახელმწიფო დრამატულმა თეატრმა ნოდარ დუმბაძის სახელობის IV საერთაშორისო თეატრალურ ფესტივალს 5-15 ივლისს უმასპინძლა. წელს ფესტივალი ნოდარ დუმბაძის დაბადების 95-ე წელს და ოზურგეთის თეატრის დაარსების 155-ე წლისთავს მიეძღვნა. ათი დღის განმავლობაში ოზურგეთის სახელმწიფო დრამატულ თეატრში მაყურებელმა ნახა უცხოეთის შვიდი თეატრის რვა და 18 ქართული თეატრის 18 წარმოდგენა. ნოდარ დუმბაძისა და ქართველი კლასიკოსი მწერლების ნაწარმოებების მიხედვით შექმნილი 26 სპექტაკლის დევიზი იყო - „ნოდარ დუმბაძე - ქართული მწერლობა“.
მნიშვნელოვანია, რომ ფესტივალში მონაწილეობისთვის უკრაინიდან წელსაც ჩამოვიდა ხერსონის აკადემიური მუსიკალურ-დრამატული თეატრი. ფესტივალის სტუმრები ასევე იყვნენ თეატრალური დასები აზერბაიჯანიდან, ესპანეთიდან, უზბეკეთიდან, პორტუგალიიდან, ორი თეატრი ყაზახეთიდან. გაიმართა ევრაზიის თეატრალური ასოციაციის (ETA) დამფუძნებელი ქვეყნების სამიტი.
წელს ფესტივალის ასეთი მასშტაბურობა ორმა ფაქტორმა განაპირობა, კერძოდ, ოზურგეთის სახელმწიფო დრამატული თეატრის ინფრასტრუქტურამ, რომლის მასშტაბური რეაბილიტაციაც ფონდ „ქართუს“ ინიციატივითა და პატრონაჟით განხორციელდა და საქართველოს კულტურის, სპორტისა და ახალგაზრდობის სამინისტროს მხარდაჭერამ.
ფესტივალის მიზანია, ხელი შეუწყოს ქართული თანამედროვე და კლასიკური მწერლობის პოპულარიზაციას, შეიტანოს წვლილი პროზაული ნაწარმოებების (რომანი, მოთხრობა, ნოველა) ინსცენირების ტრადიციების განვითარებაში, ხელი შეუწყოს ცნობილი ქართველი მწერლის, ნოდარ დუმბაძის, სახელის უკვდავყოფას, გურიაში კულტურული ცხოვრების გამოცოცხლებასა და თეატრალური ხელოვნების პოპულარიზაციას.
ფესტივალის დამფუძნებლები არიან საქართველოს კულტურის, სპორტისა და ახალგაზრდობის სამინისტრო, ნოდარ დუმბაძის სახელობის საერთაშორისო თეატრალური ფესტივალი, ოზურგეთისა და ჩოხატაურის მუნიციპალიტეტების მერიები.
ნოდარ მაჭარაშვილის შემოქმედება განსაკუთრებული პოპულარობით სარგებლობს ქართულ თეატრში . ამაზე მეტყველებს ნოდარ დუმბაძის მეოთხე საერთაშორისო ფესტივალის პროგრამაც . ფესტივალის პირველ დღეს ვიხილეთ ნოდარ დუმბაძის სახელობის მოზარდ მაყურებელთა თეატრის დადგმა „ავი მუსაიფი“ ( რეჟისორი – დიმიტრი ხვთისიაშვილი), ხოლო მესამე დღეს – გორის გიორგი ერისთავის სახელობის თეატრის „ქეიფი სოლოლაკში“,რომლის რეჟისორი და მხატვარი ნიკოლოზ ჰაინე-შველიძე გახლავთ .
რეჟისორი ასახავს კოტე აფხაზის ცხოვრების სხვადასხვა მონაკვეთებს . მაყურებელი თვალს ადევნებს როგორც მის ახალგაზრდობას (თორნიკე ბასიშვილი) ისე ზრდასრულობას (ზვიად პაპუშვილი).
მოგეხსენებათ , ძალზე რთულია პროზის სცენური ინტერპრეტაცია, მითუმეტეს,როცა ნაწარმოებში არაერთი პერსონაჟია. შესაბამისად, არსებობს მეორეხარისხოვანი როლის შემსრულებელთა მიჩქმალვის საშიშროება . ყოველივე ნიკოლაზ ჰაინე შველიძის სპექტაკლშიც ჩანს .
ნიკოლოზ ჰაინე – შველიძის სცენოგრაფია არის ძალზე მეტყველი ,ამის თვალსაჩინო მაგალითია სუფრის ათვისება. სუფრას სიმბოლურ-მეტაფორული დანიშნულება აქვს . იგი სუფრისა და ფარის როლს ასრულებს. გამოდის, რომ, ეს ჭირისა და ლხინის მეტაფორაა.
ანასტასია ჩერნეცოვა
English (UK)