English (UK) ნაბიჯ-ნაბიჯ პოლიტიკური თეატრისაკენ
ნაბიჯ-ნაბიჯ პოლიტიკური თეატრისაკენ
(„ქეიფი სოლოლაკში“ კიდევ ერთ რგოლად)
ოცდაათი წელი იქნება, რაც პოლიტიკური თეატრის დაარსების აუცილებლობას ვიმეორებ და... ადრე თუ გვიან როგორ არ დაფუძნდება ის, რაც ასერიგად მახლობელი გახლდათ სანდრო ახმეტელისათვის და რომ არა ბოლშევიკური რეჟიმის მარწუხები, კიდეც აქცევდა რეალობად ამ განზრახვას, ამ ყაიდის ცალკეულ დადგმებს ერთიანი სისტემის ისეთ საყრდენად რომ აქცევდა, პოლიტიკური თეატრი აღარც აღარასოდეს მოიშლებოდა.
თუმც ცალკეული დადგმებიც ცოტას არ ნიშნავს.
და ვცდილობ გამოვეხმაურო ხოლმე იმ ცალკეულ სპექტაკლებს, როგორც ოდესმე მაინც თავმობმული განზრახვის აუცილებელ რგოლებს.
ერთგვარ რგოლად „ქეიფი სოლოლაკში“ რომ წარმოგვიდგება:
ნოდარ მაჭარაშვილის დიალოგებზე აგებული მოთხრობის სცენური ვერსია, ხორცშესხმული ნიკოლოზ ჰაინე-შველიძის მიერ გორის დრამატულ თეატრში, და უდავოდ წარმატებუილი ნიმუში, სწორედ იმ ყაიდისაა, პოლიტიკური თეატრის მაღალ თამასას რომ გულისხმობს და ერთხელ კიდევ მოგვანდომებს მის დაფუძნებას მხოლოდ ამ შინაარსის თეატრად, თორემ ცალკეული დადგმები კვლავაც ყოველთვის შეიძლება განხორციელდეს ამათუიმ თეატრის სცენაზე.
გარდა მძაფრი საზოგადოებრივ-პოლიტიკური მუხტისა, ამგვარ თეატრს საგანმანათლებლო დანიშნულებაც ევალება.
და „ქეიფი სოლოლაკში“ ამ მხრივაც სრულფასოვანია, საგულისხმო ცნობებს რომ მიაწვდის მაყურებელს კოტე აფხაზისა და მის მიერ შექმნილი ფარული ორგანიზაციის ირგვლივ, გრიგოლ რობაქიძეს ახალი ქართლის ცხოვრების ერთ გამომსახველ ეპიზოდადაც რომ ესახებოდა.
მთავარი გმირის პორტრეტი - საერთოდაც და ამ თხრობის კვალობაზეც - ცოტა სხვაგვარად წარმომედგინა, თუმც რეჟისორისა და რუსთაველის თეატრის მსახიობის ზუკა პაპუაშვილის გადაწყვეტაც საკმაოდ კოლორიტული მომეჩვენებოდა, და კიდეც მარჯვედ უნდა გაეყოლიებინა მთელი სიუჟეტი - უცნაური, მაგრამ ფსიქოლოგიურად სავსებით დამაჯერებელი: ერთობლივი ქეიფი ბოლშევიკ-ჯალათებისა და დასახვრეტად განწირული პატრიოტებისა.
და ამიტომაც ვიმედოვნებ, რომ:
მხოლოდ პრემიერისას კი არ გადაიჭედებოდა მაყურებლით გორის თეატრის დარბაზი, არამედ „ქეიფი სოლოლაკში“ ყოველი დადგმისას მიიზიდავს ნამდვილი ხელოვნების დამფასებელ ყველა თაობას.
ახალგაზრდებს მაინც განსაკუთრებით მოეცხებათ გულზე ჰეროიკული და დრამატული სურათები და ამის გამოც სწორედ ამ ყაიდისა და რანგის სპექტაკლები გვესაჭიროება.
როსტომ ჩხეიძე 3 აპრილი, 2023
როსტომ ჩხეიძე 3 აპრილი, 2023
